՛՛Կանխատեսման նպատակը ռադարի էկրանին խնդիրները հնարավորինս շուտ վերհանելն է, որը հնարավորություն կտա անհրաժեշտ քայլեր ձեռնարկել:
Վերջինիս նպատակը ոչ թե ճիշտ լինելն է, այլ պատրաստ լինելը:՛՛
Bjarte Bogsnes,
Implementing Beyond Budgeting, 2016
Եթե նախկինում նոր բիզնես նախաձեռնություն սկսելը տարերայնորեն էր կատարվում՝ հիմնվելով հիմնադիրների և ղեկավարների փորձի և գիտելիքների վրա, ապա այսօր արդեն Հայաստանում շատ ընկերություններ հիմնվելով միջազգային փորձի վրա, ներդրել են ֆինանսական կառավարման, բյուջետավորման և կանխատեսման գործառույթներ իրենց ընկերություններում:
Agile ֆինանսական կառավարում
Կանխատեսումը շրջակա միջավայրը սկանավորելու ձև է՝ չսահմանափակելով բիզնեսը նախապես որոշված սահմաններում: Կանխատեսման նպատակը բացերը հայտնաբերելն է և այն ոլորտների վրա կենտրոնանալն է, որտեղ անհրաժեշտ է հետագա գործողություններ:
Հաստատված բյուջեներն ու նպատակները այժմ գործունակ չեն: Կանխատեսումները պետք է թարմացվեն, երբ շուկայի և բիզնեսի պայմանները փոխվում են:
Անորոշության պայմաններում կանխատեսման անհրաժեշտությունը այսօր ֆինանսական ղեկավարներին միջազգային մակարդակով ստիպել է ներմուծել և ներդնել Ծրագրերի կառավարման վերջին ժամանակներում տարածված մեթոդներ և սկզբունքներ, ինչպիսիք են “Agile”–ը և “Scrum”-ը: Վերջիններս շատ տարածված է ՏՏ ոլորտում որպես ծրագրերի ղեկավարման մեթոդ, որն ավելի ճկուն մեխանիզմներ է ենթադրում արագ փոփոխվող միջավայրին արձագանքելու համար: “Agile”-ը արժեքների և սկզբունքների համարկարգ է և մի շարք մեթոդոլոգիաներ են մշակվել այս սկզբունքների իրագործման համար, որոնցից մեկն էլ “Scrum”-ն է: “Scrum”-ը հիմնված է 3-9 հոգանոց խմբի վրա, ովքեր բաժանում են իրենց աշխատանքը առանձին գործողությունների, որոնք պետք է իրականացվեն ժամանակային իտերացիաներում, որը կոչվում է “Sprint” (սովորաբար 2-4 շաբաթ):
Որոշումների կայացման ժամկետները պետք է կրճատել, և ռեսուրսները հատկացնել միայն վերջին պահին, տալով ճկուն լինելու հնարավորություն: Սա պահանջում է հաճախակի կանխատեսումներ անել բիզնեսի կրիտիկական ոլորտներում:
